ನೋಡಿರಣ್ಣ ನೀವೆಲ್ಲ ಬಂದು

📂 ಶ್ರೀರಾಮಕೃಷ್ಣ

✍️ ಹೆಚ್ ಎನ್ ಮುರಳೀಧರ

🏷️ ಕೀರ್ತನೆಗಳು

🎵 ರಾಗ: ಮಿಶ್ರ ಪಹಾಡೀ

🥁 ತಾಳ: ಕವಾಲೀ

ಶ್ರವಣ ಮಾಡಿ

ವಿದ್ವಾನ್ ಶ್ರೀ ಗುರುರಾಜ್

ನೋಡಿರಣ್ಣ ನೀವೆಲ್ಲ ಬಂದು ಈ ನೂತನ ಮಾನವನ |
ತ್ಯಾಗ - ವಿವೇಕದ ಚೀಲಗಳೆರಡನು ಹೆಗಲಲಿ ಹೊತ್ತಿಹನ ||

ಗಂಗೆಯ ದಡದಲಿ ಹೊರಳುತ 'ತಾಯಿ' ಎನ್ನುತ ಕೂಗುವನು |
'ಕಾಣದೆ ನಿನ್ನನು ದಿನಗಳುರುಳುತಿವೆ' ಎನ್ನುತ ಮರುಗುವನು ||

ನಂಬದ ನೆಚ್ಚದ ಮಂದಮತಿಗಳಿಗೆ ಸರಳಕಥೆಯ ಹೇಳಿ |
ಕಾಳಿಯು ಕೃಷ್ಣನು ಒಂದೇ ಎನ್ನುತ ಸಾರುತಿಹನು ಕೇಳಿ ||

ಅಕ್ವಾ-ವಾಟರ್-ಪಾನಿ-ವಾರಿಗಳು ನೀರಿಗೊಂದೆ ಹೆಸರು |
ಅಲ್ಲಾ-ಜೀಸಸ್-ಮೋಸೆಸ್-ಕಾಳಿಯರು ಪರಬ್ರಹ್ಮನುಸಿರು ||

ಪಂಡಿತ - ಪಾಮರ - ಬಡವನು - ಬಲ್ಲಿದ ಭೇದ ತೋರಲಿಲ್ಲ|
ಜಾತಿಮತಗಳಾ ರೀತಿನೀತಿಗಳ ಮನಕೆ ತಾರಲಿಲ್ಲ ||

ದಿವ್ಯೋನ್ಮಾದದಿ ಬಾಹುಗಳೆರಡನು ಬೀಸಿ ಕರೆಯುತಿಹನು |
ತಾಮಸಗೈಯದೆ ಎಲ್ಲರು ಬೇಗನೆ ಬನ್ನಿರೆನ್ನುತಿಹನು ||

ಜಗದ ಜನಗಳಿಗೆ ಕೃಪೆಯನು ತೋರಲು ಕಾತರಗೊಂಡಿಹನು |
ಭವಸಾಗರವನು ದಾಟಿಸೆ ನೌಕೆಯ ತಂದು ಕಾಯುತಿಹನು ||