ಬೋಧಿವೃಕ್ಷದಡಿ ಧ್ಯಾನದಿ

📂 ಭಗವಾನ್ ಬುದ್ಧ

✍️ ಸ್ವಾಮಿ ಹರ್ಷಾನಂದ

🏷️ ಕೀರ್ತನೆಗಳು

🎵 ರಾಗ: ಯಮನ್

ಬೋಧಿವೃಕ್ಷದಡಿ ಧ್ಯಾನದಿ ಮುಳುಗಿಹ
ಯೋಗಿವರ್ಯನೆ ನೀನಾರು |
ತಪದ ತಾಪದಿಂ ದೇಹವು ಸೊರಗಿದೆ
ಜ್ಯೋತಿಯು ಹಣೆಯಲಿ ಬೆಳಗುತಿದೆ ||

ಹೊರಗಡೆ ಕಾಂಬುದು ಜೋಗಿಯ ವೇಷ
ಮುಖದಲಿ ರಾಜಕುಮಾರನ ತೇಜ |
ಯಾರ ಭವನವನು ಅಂಧಕಾರದಲಿ
ಮುಳುಗಿಸಿ ಬಂದಿಹೆ ಪೇಳೆಲೆ ಜವದಿ ||

ಜ್ಞಾನಲಾಭವೋ ದೇಹಪಾತವೋ
ಆಗಲಿ ಒಂದು ಎರಡರಲಿಂದು |
ಪಣವ ತೊಟ್ಟು ನೀ ಬಸವಳಿದಿರಲು
ಕಲ್ಲೂ ಕರಗುತ ನೀರಾಗುವುದು ||

ತಾಪತ್ರಯದಲಿ ಬೆಂದಿಹ ಜನರನು
ಉದ್ಧರಿಸಲು ನೀ ಬಂದಿಹೆಯೇನು |
ವಿಶ್ವಪ್ರೇಮವ ಪ್ರಚಾರಗೈಯಲು
ನಿಜಸುಖವನು ನೀ ತ್ಯಜಿಸಿಹೆಯೇನು ||