ಮಣಿವೆ ನಿನ್ನ ಕಮಲದಡಿಗೆ

📂 ಶ್ರೀರಾಮಕೃಷ್ಣ

✍️ ಸ್ವಾಮಿ ತದ್ರೂಪಾನಂದ

🏷️ ಕೀರ್ತನೆಗಳು

🎵 ರಾಗ: ಭೀಮಪಲಾಸೀ

🥁 ತಾಳ: ಏಕತಾಲ

ಮಣಿವೆ ನಿನ್ನ ಕಮಲದಡಿಗೆ
ದಯದಿ ಬಾರೊ ಎದೆಯ ಗುಡಿಗೆ ||

ಭಕ್ತಹೃದಯಜಲಜ ಬಂಧು
ನೀನಪಾರ ಕರುಣೆ ಸಿಂಧು |
ಪ್ರೇಮಭಕ್ತಿಯೊಡನೆ ಕೂಡಿ
ಬಾರೈ ತಂದೆ ಕರೆವೆ ಬೇಡಿ ||

ತ್ಯಾಗಮೂರ್ತಿ ತಪೋಮೂರ್ತಿ
ಜ್ಞಾನಮೂರ್ತಿ ಸೊಗದ ಮೂರ್ತಿ |
ಹರಿದಿದೆಲ್ಲೆಡೆ ನಿನ್ನ ಕೀರ್ತಿ
ತ್ಯಾಗಪಥದ ನಿತ್ಯಸ್ಫೂರ್ತಿ ||

ವಿಶ್ವದೊಡೆಯ ಶುದ್ಧಹೃದಯ
ಕೋಟಿಸೂರ್ಯ ಜ್ಯೋತಿರೂಪ |
ನಿನ್ನೀ ಕಂದನ ಕರೆಯನಾಲಿಸಿ
ಬಾರೋ ಬೇಗ ಶಕ್ತಿವೆರಸಿ ||