ನನ್ನ ಜನನಿ ನಿನ್ನ ಜನನಿ

🏷️ ಕೀರ್ತನೆಗಳು

🎵 ರಾಗ: ಅಲೈಯಾ ಬಿಲಾವಲ್

🥁 ತಾಳ: ಏಕತಾಲ

ನನ್ನ ಜನನಿ ನಿನ್ನ ಜನನಿ
ಎಂಬ ಭೇದ ಸಲ್ಲದು|
ಅವಳು ಜಗದ ಕೋಟಿಕೋಟಿ
ಜೀವಜನ್ಮದಾತೆಯು||

ತಾಯೆ ನಿನ್ನ ಸಮ್ಮುಖದಲ್ಲಿ
ನಾವು ಕೂಡಿ ನಲಿವೆವು|
ನಿನ್ನ ವಾತ್ಸಲ್ಯಸುಧೆಯ
ನೀಡಿ ಎಮ್ಮ ಕಾಪಿಡು||

ಅಮ್ಮಾ ಎಂದು ಎಷ್ಟು ಬಾರಿ
ಕರೆದರದೂ ಸಾಲದು!
ತಾಯ ಮಧುರ ಋಣವ ನಾವು
ತೀರಿಸಲೇ ಆರೆವು||

ಮೈಮನಗಳ ಮರೆಸುವಂಥ
ದಿವ್ಯನಾಮವಿಲ್ಲಿದೆ!
ಅಮ್ಮಾ ಎಂಬ ನಾಮಸುಧೆಗೆ
ಜಗದಿ ಸಾಟಿ ಎಲ್ಲಿದೆ||

ಪರಬ್ರಹ್ಮ ಆದಿಶಕ್ತಿ
ಎನಿತೊ ನಾಮ ಅವಳಿಗೆ
ಅಮ್ಮಾ ಎಂಬ ಒಂದೆ ನಾಮ
ಸಾಕು ನಮ್ಮ ಪಾಲಿಗೆ||

← ಶ್ರೀಶಾರದಾದೇವಿ ಸ್ವಾಮಿ ಪುರುಷೋತ್ತಮಾನಂದ ಕೃತಿಗಳು →

ನನ್ನ ಜನನಿ ನಿನ್ನ ಜನನಿ

✍️ ಪ್ರತಿಕ್ರಿಯೆ ಬರೆಯಿರಿ