ವನಸುಮದೊಲೆನ್ನ

📂 ಶ್ರೀಗುರು

✍️ ಡಿ.ವಿ.ಜಿ.

🏷️ ಕೀರ್ತನೆಗಳು

🎵 ರಾಗ: ಅಸಾವೇರೀ

🥁 ತಾಳ: ಝಪತಾಲ

ಶ್ರವಣ ಮಾಡಿ

ವಿದ್ವಾನ್ ಶ್ರೀ ಗುರುರಾಜ್

ವನಸುಮದೊಲೆನ್ನ ಜೀ -
ವನವು ವಿಕಸಿಸುವಂತೆ
ಮನವನನುಗೊಳಿಸು ಗುರುವೇ ಹೇ ದೇವ ||

ಜನಕೆ ಸಂತಸವೀವ
ಘನನು ನಾನೆಂದೆಂಬ
ಎಣಿಕೆ ತೋರದೆ ಜಗದ ಪೊಗಳಿಕೆಗೆ ಬಾಯ್ಬಿಡದೆ ||

ಕಾನನದಿ ಮಲ್ಲಿಗೆಯು
ಮೌನದಿಂ ಬಿರಿದು ನಿಜ
ಸೌರಭವ ಸೂಸಿ ನಲವಿಂ |

ತಾನೆಲೆಯ ಪಿಂತಿರ್ದು
ದೀನತೆಯ ತೋರಿ ಅಭಿ -
ಮಾನವನು ತೊರೆದು ಕೃತಕೃತ್ಯತೆಯ ಪಡೆವಂತೆ ||

ಉಪಕಾರಿ ನಾನು ಎ -
ನ್ನುಪಕೃತಿಯು ಜಗಕೆಂಬ
ವಿಪರೀತಮತಿಯನುಳಿದು |

ವಿಪುಲಾಶ್ರಯವನೀವ
ಸುಫಲ ಸುಮಭರಿತ ಪಾ -
ದಪದಂತೆ ನೈಜಮಾದೊಳ್ಪಿನಿಂ ಬಾಳ್ವವೊಲು ||