ವಿಪ್ರವನಿತೆಯಂಕದಲ್ಲಿ

📂 ಶ್ರೀರಾಮಕೃಷ್ಣ

🏷️ ಕೀರ್ತನೆಗಳು

🎵 ರಾಗ: ಕಾಂಬೋಧಿ

🥁 ತಾಳ: ರೂಪಕತಾಳ

ಶ್ರವಣ ಮಾಡಿ

ಸ್ವಾಮಿ ಭಗವದಾನಂದ

ವಿಪ್ರವನಿತೆಯಂಕದಲ್ಲಿ
ನಲಿವನಾರು ಬೆಳಕ ಚೆಲ್ಲಿ|
ಧರಿಸಿ ದಿಶೆಯ ಚೆಲುವ ಕುವರ
ಒಲಿದು ಬಂದೆ ಬಡಕುಟೀರ ||

ಭೂತಲಕೆ ಇಳಿದು ಬಂದೆ
ಯಾರು ನೀನು ಕಣ್ಮಣಿ |
ಆರ್ತ ಜನರ ತಾಪ ಕಳೆಯೆ
ಸುರಿಸಿ ಕರುಣೆ ಕಂಬನಿ ||

ನೊಂದ ಜನಕೆ ನೆರವ ನೀಡೆ
ಬಂದೆಯೇನು ಗೋಪ್ಯವಾಗಿ |
ಕಂದ ಮೊಗದಿ ಕರುಣೆ ತಳೆದು
ಅಳುವೆ ನಗುವೆ ಯಾರಿಗಾಗಿ ||

ರೂಪರಾಶಿ ಕಂಡು ನಿನ್ನ
ಸೆಳೆಯಲಾರೆ ನೆಟ್ಟ ಕಣ್ಣ|
ತಾಪತಿಮಿರನಾಶಿ ನಿನ್ನ
ತೋಳಲೆತ್ತಿಕೊಂಬೆ ಚಿನ್ನ ||