ನಿನ್ನ ನೋಡಿ ಧನ್ಯನಾದೆನೊ ಹೇ ಶ್ರೀನಿವಾಸ

📂 ಶ್ರೀಕೃಷ್ಣ

✍️ ಪುರಂದರದಾಸ

🏷️ ಕೀರ್ತನೆಗಳು

🎵 ರಾಗ: ಪಂತುವರಾಳಿ

🥁 ತಾಳ: ರೂಪಕತಾಳ

ನಿನ್ನ ನೋಡಿ ಧನ್ಯನಾದೆನೊ
ಹೇ ಶ್ರೀನಿವಾಸ ॥

ಪಕ್ಷಿವಾಹನ ಲಕ್ಷ್ಮೀರಮಣ
ಲಕ್ಷ್ಯವಿಟ್ಟು ನೋಡೋ ಪಾಂಡು-
ಪಕ್ಷ ಸರ್ವದೈತ್ಯಶಿಕ್ಷ
ರಕ್ಷಿಸೆನ್ನ ಕಮಲಾಕ್ಷ ॥

ದೇಶ ದೇಶ ತಿರುಗಿ ನಾನು
ಆಸೆಬದ್ಧನಾದೆ ಸ್ವಾಮಿ
ದಾಸನು ನಾನಲ್ಲವೆ ಜಗ-
ದೀಶ ಶ್ರೀಶ ಶ್ರೀನಿವಾಸ ॥

ಕಂತುಜನಕ ಕೇಳೊ ಎನ್ನ
ಅಂತರಂಗದಾಸೆಯನ್ನು
ಅಂತರವಿಲ್ಲದೆ ಪಾಲಿಸು ಶ್ರೀ-
ಕಾಂತ ಪುರಂದರ ವಿಠ್ಠಲ ॥