ಎಲ್ಲಾ ರೂಪವು ತಾನಂತೆ ಶಿವ

📂 ಶ್ರೀಶಿವ

✍️ ಶಿವರಾಮಶಾಸ್ತ್ರೀ

🏷️ ಕೀರ್ತನೆಗಳು

🎵 ರಾಗ: ಧನ್ಯಾಸಿ

🥁 ತಾಳ: ಆದಿತಾಳ

ಎಲ್ಲಾ ರೂಪವು ತಾನಂತೆ ಶಿವ-
ನೆಲ್ಲೆಲ್ಲಿಯು ತಾನಿಹನಂತೆ
ಅಲ್ಲಲ್ಲರಸುತ ಗುಡಿಗಳ ತಿರುಗುವ
ಕಳ್ಳರ ಕಣ್ಣಿಗೆ ಮಣ್ಣಂತೆ ॥

ಕಣ್ಣೆಂಬುದು ತನಗಿಲ್ಲಂತೆ
ಕಣ್ಣಿಗೆ ಕಣ್ಣಾಗಿಹನಂತೆ
ಕಣ್ಣು ಬಿಟ್ಟು ತನ್ನರಸುವ ಜನರಿಗೆ
ಬಣ್ಣ-ಬಣ್ಣವಾಗಿಹನಂತೆ ||

ದೃಶ್ಯವಿದಾದವ ತಾನಂತೆ
ದೃಶ್ಯವನರಿವನು ತಾನಂತೆ
ದೃಶ್ಯಾದೃಕ್ಕಿನೊಳೆರಡರ ನಡುವೆ
ಶಾಶ್ವತನಾದವ ತಾನಂತೆ ॥

ಕಳೆದುಳಿಯುವುದೇ ತಾನಂತೆ
ಉಳಿಯುವ ಕಳೆಯುವರಿಲ್ಲಂತೆ
ಕುಲಶೀಲಗಳೆಂಬ ಕೊಳೆಯಿಲ್ಲದೆ ನಿರ್‌-
ಮಲದೊಳಗಿರುವನು ತಾನಂತೆ ॥