ಕರುಣ ಶೀತಲ

📂 ಭಗವಾನ್ ಬುದ್ಧ

✍️ ಸ್ವಾಮಿ ಶಾಸ್ತ್ರಾನಂದ

🏷️ ಕೀರ್ತನೆಗಳು

🎵 ರಾಗ: ಅಸಾವೇರೀ

🥁 ತಾಳ: ತೇವರಾ

ಕರುಣ ಶೀತಲ ಕಿರಣ ಶೋಭಿತ
ತರಣಿ ನಿನ್ನಯ ಚರಣಕೆರಗುವೆ ||

ಕಾಮ ಮೋಹದ ತಮವ ಕಳೆಯಲು
ಪ್ರೇಮ ಜ್ಯೋತಿಯ ಕಾಂತಿ ಬೆಳಗಿಹೆ |
ವಿಷಮ ಶೈತ್ಯದಿ ಭೀತ ಜಗಕೆ
ಸೌಮ್ಯ ಸಮತೆಯ ಸ್ಥೈರ್ಯ ನೀಡಿಹೆೆ ||

ಕರ್ಮಕಾಂಡದ ಕ್ರೌರ್ಯ ಜಡತೆಯಿಂ
ಧರ್ಮಶಾಸ್ತ್ರದ ಶುಷ್ಕವಾದದಿಂ |
ಧರ್ಮಬಾಳ್ವೆಯ ಸಲಹಲೆಂದು
ಧರ್ಮಮೂರುತಿ ಇಳಿದು ಬಂದೆ ||

ಸರ್ವಧರ್ಮದ ಸರ್ವಕರ್ಮದ
ಸರ್ವಸಾರವ ತೆರೆದು ತೋರಿದೆ
ಸರ್ವಸೃಷ್ಟಿ ವಿಮುಕ್ತಿಸಾಧಕ
ಸರ್ವತ್ಯಾಗಿ ಸಾರ್ವಭೌಮ ||