ನೆನೆಯ ಬಾರದೆ ಮನವೆ ಪರಮಪಾವನನ

📂 ಶ್ರೀಕೃಷ್ಣ

✍️ ಕನಕದಾಸ

🏷️ ಕೀರ್ತನೆಗಳು

🎵 ರಾಗ: ಮುಖಾರಿ

🥁 ತಾಳ: ಆಟತಾಳ

ನೆನೆಯ ಬಾರದೆ ಮನವೆ ಪರಮಪಾವನನ ||ಪ||

ಸಾಕಾರದಿಂದ ಸರ್ವರನು ರಕ್ಷಿಪನ
ಜೋಕೆಯಲಿ ತನ್ನ ನೆನೆವವರ ಪಾಲಿಪನ- ಆ
ನೇಕ ಮೂರುತಿ ಸೂರ್ಯನಾರಾಯಣನ ||1||

ಬ್ರಹ್ಮಾಂಡ ಕೋಟಿ ತಿಮಿರವ ಗೆಲುವವನ
ಒಮ್ಮೆ ನೆನೆಯಲು ಪ್ರಸನ್ನನಾದವನ
ಧರ್ಮಕ್ಕೆ ಸಾಕ್ಷಾತ್ ರೂಪಾಗಿ ತೋರುವನ
ನಿರ್ಮಲಾತ್ಮಕವಾಗಿ ಥಳಥಳಿಸುವವನ ||2||

ಹರಗೆ ನಯನವಾಗಿ ಮಕುಟವ ಬೆಳಗುವನ
ತರುಣಿಯೈವರ ಲಜ್ಜೆ ಕಾಯ್ದವನ
ದುರಿತಕೋಟಿಗಳನುದ್ಧರಿಸುವವನ
ಪರಬ್ರಹ್ಮ ಕಾಗಿನೆಲೆಯಾದಿಕೇಶವನ
ಮರೆಯದೆ ಭಜಿಪರ ಕಾಯುವವನ ||3||